ספריית חב"ד ליובאוויטש

תתקטז

ב"ה, ז' אדר א', תשי"א ברוקלין.

שלום וברכה!

אין ענטפער אויף אייער בריף פון ב' פ' משפטים און פ"נ.

מ'דארף זיין שטארק אין בטחון בהשי"ת, וואס פירט מיט דער גאנצער וועלט אהן אויסנאם, אז ער וועט אייך היטען און באשיצען, און סוף סוף בריינגען צו א הסתדרות טובה בגשמיות וברוחניות.

מ'דארף אויך האבען גוטע כלים אויף מקבל זיין די אלע ברכות, און דאס איז תורה ומצות, ובפרט: זאגען תהלים יעדער טאג ווי דער תהלים איז צוטיילט לימי החדש, לערנען יעדער טאג א פרשה חומש פון דער סדרה מיט רש"י (זונטאג ביז שני, מאנטאג ביז שלישי א. א. וו.) און דעם שיעור תניא ווי צוטיילט דורך כ"ק מו"ח אדמו"ר לימי השנה.

פארוואס דערמאנט איר גארניט וועגן א שידוך?

דער אויבערשטער זאל אייך העלפן אינגיכען אנזאגען בשורות טובות.

בברכה.